庄骹囡仔

台中廳拺東下堡陳平庄一二三番地-台中陳平紫微宮


　　今啊日是咱儂新正年頭个初一，早時起來歸家伙啊就去庄內个廟拜拜，祈求新个一年會當平安順序，廟裡去拜拜个儂真濟，歸个廟內廟埕滿滿是，佇廟前个石獅佮龍柱个龍頭頂攏有結一粒紅彩，廟埕尾个門口排了勿會少攤頭啊，有賣金紙个、賣煙腸个、賣糖葱个、賣雞歸啊，看著真熱鬧，有年節時个感覺，真讚！


　　今年過年拄著烏寒，溫度真低，擱落雨，腳尾手尾攏冷吱吱，寒到強欲擋勿會著，不擱照節氣來講，今啊是大寒過了，行入立春个時陣，烏寒是真對時，若無烏寒就無啥形過年啊！有一句話講：「人若無照天理，天就無照甲子。」這一句講著真有理，這幾年啊，氣候有當時啊攏無照節氣佇咧行，予儂感覺講是不是環境污染害著氣候變作無正常，這是不是尚要緊个原因，到今咱猶無足瞭解个，不擱對著環境注重定著無敗害啦！


　　新年頭舊年尾，丁亥豬年過了換戊子鼠年，大家攏仰望有一个好个起頭，講實在个肯認真打拚，心頭掠予定，不管收成好抑無好，加減攏有收成，人講：「肯做牛，免驚得無犁通好拖！」，敢不是安呢？